15-апрелде И. Абдраимов атындагы Кыргыз авиациялык институтунда «Кыргыз Республикасындагы тил саясаты, мамлекеттик тилди өнүктүрүүдөгү жогорку окуу жайлардын орду жана ролу» аттуу семинар өткөрүлдү.

Семинарда Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясынын Тил саясаты бөлүмүнүн башкы адиси Асылбек Орозов, Окуу-маалыматтык жана котормо борборунун директору Карлыгач Жумакадырова, аталган борбордун жетектөөчү адиси Зияда Шамуратова, ошондой эле Санарип жана инновациялар бөлүмүнүн башкы адиси Талгат Садырбеков  баяндама жасашты.

Баяндамаларда «Кыргызтест» системасы тууралуу кеңири маалымат берилип, тестке даярдануунун методикалык көрсөтмөлөрү түшүндүрүлдү. Мындан тышкары, Улуттук комиссия тарабынан иштелип чыккан видеосабактар, 2021–2025-жылдарга карата мамлекеттик тилди өнүктүрүү программасынын алкагында иштелип чыккан программалык продуктылар тууралуу маалымат берилди.

Анын ичинде «Айтил» улуттук жасалма интеллекти, Document.gov.kg порталы, «Кыргызча оңой / Easy Kyrgyz» мобилдик тиркемеси, ошондой эле балдарга арналган колдонмолор жана кыргыз тилинин жазуу эрежелерине байланыштуу видеосабактар сунушталды.

Иш-чаранын жүрүшүндө мамлекеттик тилде иш кагаздарын сабаттуу жүргүзүү боюнча түшүндүрмөлөр берилип, Мамлекеттик тил жана тил саясаты боюнча улуттук комиссия тарабынан окуу жайга китептер белекке тапшырылды.