2026-жылдын 29-апрелинде Транспорттук прокуратура тарабынан жашы жете электер арасында укук бузуулардын алдын алуу, укуктук маданиятты жогорулатуу жана жаш муунга кесиптик багыт берүү максатында Чүй облусунун Новопокровка айылында жайгашкан «Алтын Уя» кайрымдуулук үйүнүн 6–11-класстарынын окуучулары И. Абдраимов атындагы Кыргыз авиациялык институтуна барышты.
Иш-чаранын алкагында институттун жетекчилиги жана окутуучулар курамы окуучулар үчүн окуу корпустары боюнча тааныштыруу экскурсиясын уюштурушту. Балдар окуу процесси менен таанышып, аба кемелеринин макеттерин көрүштү, авиациянын өнүгүү тарыхы тууралуу маалымат алышты. Ошондой эле институттун музейине барып, авиациялык техникалардын экспозициясын көрүштү.
Экскурсия интерактивдүү форматта өтүп, окуучулар өздөрүн кызыктырган суроолорду берип, адистерден кеңири жоопторду алышты.
Мындан тышкары, окуучулар Улуу Ата Мекендик согуштагы Жеңиштин 81 жылдыгына арналган иш-чарага катышышты. Алар кыргыз авиациясынын баатырларын эскерип, эстеликтерге гүл коюшту жана институттун студенттери тарабынан уюштурулган салтанаттуу иш-чарага күбө болушту.
Экскурсиянын жыйынтыгында окуучуларга улуу жазуучу Чыңгыз Айтматовдун чыгармаларынан турган китептер белекке берилди. Бул белектер жаш муунду улуттук маданий мураска жана руханий баалуулуктарга жакындатууга багытталган.
Мындай иш-чаралар жаштардын өлкө тарыхына болгон урмат-сыйын калыптандырып, укуктук маданиятын жогорулатууга жана келечектеги кесибин аң-сезимдүү тандоого өбөлгө түзөт.
